पोखरा रंगशालामा ग्यालरी ‘सि’ तर्फको सिट जडान सम्पन्न

राखेप/एनओसी

Home
राखेप/एनओसी
पोखरा रंगशालामा ग्यालरी ‘सि’ तर्फको सिट जडान सम्पन्न

पोखरा रंगशालामा ग्यालरी ‘सि’ तर्फको सिट जडान सम्पन्न

पोखरा, मंसिर ८ । १३औँ दक्षिण एसियाली खेलकुद (साग) लक्षित निर्माण गरिएको पोखरा फुटबल मैदानको ग्यालरी ‘सी’ अन्तर्गतको विशिष्ट श्रेणीसहितको प्यारापिटमा सिट जडान गरिएको छ । पोखरा रंगशाला फुटबल मैदानमा महिला फुटबल प्रतियोगिता हुने भएपछि यति बेला फुटबल मैदानको काम समेत धमाधम भइरहेको छ ।

पोखरामा मुख्य खेलको रुपमा समेत हेरिएको महिला फुटबलको लागि निमार्णाधिन फुटबल मैदानमा प्रतियोगिताको लागि तत्काल पूर्व र पश्चिम भागमा प्यारापिट जडान गरिने छ । मैदानको लागि दुबो भारतको कोलकत्ताबाट ल्याइएको हो भने प्यारापिटका लागि स्टिल मोडुलर ग्राण्ड स्ट्यान्डका सामान भने फ्रान्सबाट ल्याइएको हो । उक्त प्यारापिट जडानको लागि फ्रान्सबाट दुई जना प्राविधिक समेत पोखरा आएका छन् ।

पोखरा रंगशालामा नवनिर्मित प्यारापिटमा जडित सिटहरु रातो र निलो रंगको रहेको छ । ति सिटहरु नेपालको झण्डासंग मिल्ने गरी राखिएको हो । मैदानको काम लगभग अन्तिम अवस्थामा रहेको र करिब १० हजार दर्शक क्षमताको सिट जडान गरिने प्रोजेक्ट म्यानेजर बरालले जानकारी दिए । सागअन्तरगत महिला फुटबल प्रतियोगिता पोखरा रंगशाला फुटबल मैदानमा हुने छ भने अभ्यास स्थलको लागि दोबिल्लामा रहेको सहारा एकेडेमीको खेल मैदान, हेम्जामा रहेको गौरीशंकर खेल मैदान, प्रहरी गण तालिम केन्द्र र पश्चिम पृतना विजयपुरको खेल मैदान तोकिएका छन् ।

म्हिला फुटबल मंसिर १७ देखि २४ गते सम्म हुने छ । प्रतियोगितामा चार राष्ट्रको सहभागीता रहेको छ । आयोजक नेपालसहित भारत, माल्दिभ्स र श्रीलंकाले खेलमा सहभागीता जनाएका छन् भने बंगलादेश, भुटान र पाकिस्तानले भने सहभागीता जनाएका छैनन् ।

त्यसैगरी, ट्रयाक एण्ड फिल्डको लागि अन्तर्राष्ट्रिय एथलेटिक्स महासंघका प्राविधिक टोलीहरु आज पोखरा आइपुग्ने प्रोजेक्ट म्यानेजर बरालले बताए ।

प्रकाशित मिति: आइतबार, मंसिर ८, २०७६ ०७:११

प्रतिक्रिया दिनुहोस्