काठमाडौं, पुस ५ । नेपाल ओलम्पिक कमिटि (एनओसी) र नेपाल ओलम्पिक संग्राहलयले ‘नेपाली खेलकुद डिजिटल संग्रह परियोजना २०२०–२१’ सुरु गर्ने भएको छ । आज पत्रकार सम्मेलन गर्दै एनओसीले नेपाली खेलकुदको अभिलेखिकरण गर्ने परियोजनाको औपचारिक सुरुवात गरेको हो ।
एनओसीका अध्यक्ष जीवनराम श्रेष्ठले उक्त परियोजनाको घोषणा गर्दै यसलाई खेलकुदको ऐतिहासिक दिनको रुपमा ब्याख्या गरे । उनले खेलकुदको ईतिहासलाई जगेर्ना गर्न संग्राहलयको परियोजना सफल हुने विश्वास ब्यक्त गरे ।
एनओसीका अनुसार अन्तर्राष्ट्रिय ओलम्पिक कमिटि (आईओसी)को आईओसी ओलम्पिक सोलिडारिटी कार्यक्रम अन्तर्गत उक्त प्रोजेक्ट हुन लागेको हो । त्यसका लागि सोलिडारिटी कार्यक्रमले आर्थिक अनुदान प्रदान गर्ने एनओसी अध्यक्ष श्रेष्ठले जनाएका छन् । परियोजनाका लागि एनओसीले सोलिडारिटी कार्यक्रम अन्तर्गत पहिलो चरणमा १५ हजार अमेरिकी डलर प्राप्त गरेको छ ।
पत्रकार सम्मेलनमा एनओसीका महासचिव निलेन्द्र राज श्रेष्ठ, कार्यकारी निर्देशक चतुरानन्द वैद्य, सुजनलाल श्रेष्ठलगायतको उपस्थित रहेको थियो ।कार्यक्रममा संग्राहलयका अध्यक्ष क्षितिजअरुण श्रेष्ठ र उपाध्यक्ष एसपी त्रिपाठीले संग्रालयको कामलाई प्रभावकारी तरीकाले अगाडि बढाउने प्रतिवद्धता जनाए ।
ओलम्पिक कमिटिले खेलकुदको ईतिहासमा अभिलेखिकृत गरेर नयाँ पुस्तालाई हस्तान्तरण गर्ने प्रयास स्वरुप परियोजना अघि बढाउन लागिएको बताएको छ । एनओसीले नेपाल ओलम्पिक संग्रहालयसंग मिलेर परियोजनालाई अघि बढाउने छ ।
सो कार्यक्रमलाई लिएर मार्चमा एनओसी र ओलम्पिक संग्रहालयबीच सम्झौता भएको थियो । एनओसीले विभिन्न खेलको सुरुवात, खेलकुद ऐनसंग सम्बन्धित दस्तावेज, एनओसीको ईतिहास, अन्तर्राष्ट्रिय प्रतियोगितामा नेपालको प्रर्दशन, प्रतियोगितासंग सम्बन्धित तस्विर र भिडियो संकलनको प्रयास गरिने बताएको छ । परियोजनाले नेपाली खेलकुदको डिजिटल आर्काईभको रुपमा आकार लिने र सबैका लागि उपलब्ध हुने उल्लेख गरेको छ । संग्राहलयमा ओलम्पिकसंग आबद्ध खेललाई बढी प्राथमिकता दिईने एनओसीले जनाएको छ ।
-1789698769.jpg)
-1788016865.jpg)