कल्याणकारी कोषद्वारा खेलाडीलाई उपचार खर्च

राखेप/एनओसी

Home
राखेप/एनओसी
कल्याणकारी कोषद्वारा खेलाडीलाई उपचार खर्च

कल्याणकारी कोषद्वारा खेलाडीलाई उपचार खर्च

खेलकुद मञ्‍च 2078-3-22

काठमाडौं, असार २२ । राष्ट्रिय खेलाडी कल्याणकारी कोषले विभिन्न ४ खेलका त्यत्ति नै खेलाडीलाई सहयोग स्वरुप सोमबार उपचार खर्च उपलब्ध गराएको छ । नेपाल राष्ट्रिय तथा अन्तर्राष्ट्रिय खेलाडी संघका अध्यक्ष समेत रहेका कोषका सदस्य–सचिव दीपक श्रेष्ठका अनुसार चार खेलाडीलाई २ लाख ९ हजार ६ सय ५५ रुपैयाँ प्रदान गरिएको हो ।

ब्याडमिन्टनकी रञ्जना भट्ट र टेबलटेनिसकी मारिया थापा मगरलाई समान ८०–८० हजार प्रदान गरियो भने जुडोकी सुनिता बोहरालाई ३० हजार र उसुकी सिलु डंगोललाई १९ हजार ६ सय ५५ रुपैयाँ उपलब्ध गराइएको थियो ।

सुदूरपश्चिम प्रदेशमा रहेकी जुडोकी सुनिताको रकम नेपाल जुडो संघका अध्यक्ष दीपकहर्ष बज्राचार्यलाई हस्तान्तरण गरिएको थियो । खेलाडी संघका उपाध्यक्ष समेत रहेका राष्ट्रिय खेलकुद परिषद्का सदस्य हरि खड्काले खेलाडीलाई सहयोग रकम बराबरको चेक हस्तान्तरण गरेका थिए ।

चालू आर्थिक वर्षमा कोषले यि ४ खेलाडीसहित १३ खेलाडीलाई उपचार खर्चवापत जम्मा ११ लाख ३४ हजार ६ सय ५५ रुपैयाँ वितरण गरिसकेको छ । यसअघि विभिन्न ५ खेलका खेलाडी र पूर्व खेलाडी गरी ९ जनालाई ९ लाख २५ हजार रुपैयाँ प्रदान गरिसकेको कोषले जनाएको छ ।

उक्त कोष २०६८ सालमा १ करोड रकमबाट स्थापना गरिएको थियो । हाल कोषमा जम्मा १ करोड ४० लाख रपैयाँ रहेको सदस्य–सचिव श्रेष्ठले जानकारी दिए । त्यसैको ब्याजबाट मर्कामा परेका खेलाडीलाई सहयोग गरिदैँ आइएको छ ।

प्रकाशित मिति: मंगलबार, असार २२, २०७८ १७:०७