रत्नलाई पराजित गर्दै प्रिन्स फाईनलमा

राखेप/एनओसी

Home
राखेप/एनओसी
रत्नलाई पराजित गर्दै प्रिन्स फाईनलमा

रत्नलाई पराजित गर्दै प्रिन्स फाईनलमा

खेलकुद मञ्‍च 2077-8-26

काठमाडौं, मंसिर २६ । नेपालका उदियमान खेलाडी प्रिन्स दाहाल सेनाका रत्नजित तामाङ्गलाई पराजित गर्दै तेश्रो चौतारा साँगाचोकगढी मेयर कप तथा प्रथम तोप–२१ ब्याडमिन्टन प्रतियोगिताको राष्ट्रियस्तरीय पुरुष एकलको फाईनल प्रवेश गरेका छन् । बिहिबार सम्पन्न सेमिफाईनल खेलमा सिल्क ग्रुपका दाहालले तामाङ्गलाई २१–१९, २१–१६ को सोझो सेटमा पराजित गरे ।

निकैनै आक्रमक देखिएका प्रिन्सले रत्नलाई सम्हालिने मौकानै प्रदान गरेनन् । अब उपाधिको लागि प्रिन्सले सेनाका नबिन श्रेष्ठको सामना गर्ने छन् । साँगाचोकगढी नगरपालिकाको प्रायोजन तथा तोप–२१ को आयोजनामा भएको प्रतियोगिताको अर्को सेमिफाईनलमा नबिनले सेनाकै रुकेश महर्जन माथि २१–१७, २१–१० को जित निकाल्दै फाईनलमा प्रिन्ससंगको भेट पक्का गरेका हुन् ।

यसअघि आठौं राष्ट्रिय खेलकुद अन्तरगत दाङ्गमा भएको ४०औं राष्ट्रिय प्रतियोगितामा पनि सुदूरपश्चिमबाट खेलेका प्रिन्सले मेन्स टिम ईभेन्ट्समा रत्नलाई पराजित गरेका थिए । हालै निस्केको विश्व जुनियर बरियतामा प्रिन्स ११औं स्थानमा रहेका छन् भने ब्याडमिन्टन एशियाले प्रिन्सलाई उत्कृष्ट जुनियर खेलाडी घोषित गरेको थियो । बिहिबार भएको क्वाटरफाईनलको खेलमा सेनाका रत्नजितले पुलिसका जीवन आचार्यलाई २१–१०, २१–१३ र प्रिन्सले सेनाका पविन लिनथेपलाई दुबै सेट २१–१७ को समान अंकले पराजित गर्दै सेमिमा भिडन्त पक्का गरेका थिए । यस्तै अर्को खेलमा नबिनले आफ्नै क्लबका प्रफुल महर्जन माथि २१–१२, १६–२१ र २१–१८ तथा सेनाका रुकेश महर्जनले एपिएफका साजन कृष्ण ताम्राकारलाई २१–१३, २१–१६ को सोझो सेटमा पराजित गर्दै सेमिमा स्थान पक्का गरेका थिए ।

कोरोनाका कारण प्रतियोगिताबाट बञ्चित रहेका राष्ट्रिय खेलाडीहरुले पहिलो पटक प्रतियोगितामा सहभागिता जनाइरहेका छन् । राष्ट्रियस्तरका १६ खेलाडीहरुको सहभागिता रहेको प्रतियोगिताको फाईनल खेल आज(शुक्रबार) हुनेछ । राष्ट्रियस्तरको पुरुष एकलका विजयी खेलाडीले नगद एक लाख ११ हजार एक सय ११ र उपविजेताले ५५ हजार पाँच सय ५५ प्राप्त गर्ने छन् । ब्याडमिन्टनको इतिहासमा यती ठूलो रकमको पुरस्कार रहेको यो पहिलो हो । यस्तै सेमिफाईनलिष्ट रत्नजित र रुकेशले जनही १०/१० हजार प्राप्त गर्ने छन् ।

प्रकाशित मिति: शुक्रबार, मंसिर २६, २०७७ ०८:१२