काठमाडौं । साबिक विजेता गुजरातलाई हराउँदै चेन्नई सुपर किंग्सले १६ औँ संस्करणको इन्डियन प्रिमियर लिग आईपीएलको उपाधि जितेको छ । अहमदाबादस्थित नरेन्द्र मोदी क्रिकेट रंगशालामा सोमबार सम्पन्न फाइनलमा गुजरात टाइटन्सलाई डकवर्थ लेविस पद्धतिमा पाँच विकेटले पराजित गर्दै चेन्नईले उपाधि जितेको हो ।
योसँगै चेन्नईले मुम्बई इन्डियन्सले सर्वाधिक पाँच पटक उपाधी जितेर बनाएको कीर्तिमान बराबरी गरेको छ । यसअघि सन् २०१०, २०११, २०१८ र २०२१ मा चेन्नईले उपाधि जितेको थियो । सन् २००८, २०१२, २०१३, २०१५, २०१९ मा चेन्नई उपविजेता बनेको थियो । सन् २०१६ र २०१७ मा चेन्नई टिम नै निलम्बित भयो ।
वर्षाले प्रभावित खेलमा गुजरातले निर्धारित २० ओभरमा ४ विकेट गुमाएर २ सय १४ रनको विशाल योगफल खडा गरेको थियो । दोस्रो इनिङको तीन बलको खेल हुँदा वर्षा भएपछि खेल लामो समय रोकिएको थियो । वर्षाका कारण खेल अवरुद्ध बनेपछि चेन्नाईले १५ ओभरमा १७१ रन बनाउनु पर्ने नयाँ लक्ष्य पाएको थियो ।
रोमाञ्चक प्रतिस्पर्धामा जितको लागि १ सय ७१ रनको विशाल विजयी लक्ष्य पछ्याएको चेन्नईले निर्धारित १५ ओभरमा ५ विकेट गुमाउँदै पूरा गर्यो । चेन्नईलाई जितको लागि अन्तिम दुई बलमा १० रन चाहिँदा रविन्द्र जडेजाले पाँचौ बलमा सानदार छक्का र छैटौं बलमा चौका प्रहार गर्दै सनसनीपूर्ण जित दिलाएका थिए ।
रविन्द्र जडेजाले ६ बलमा १ चौका र १ छक्कासहित अविजित १५ रन बनाएका थिए । शिव दुबे २१ बलमा दुई छक्कासहित ३२ रनमा अविजित रहेका थिए । चेन्नईलाई ओपनर ऋतुराज गायकवाड र डेभन कन्वेले ६.३ ओभरमा ७४ रन जोड्दै उत्कृष्ट सुरुवात दिलाएका थिए ।
डेभन कन्वे २५ बलमा ४ चौका र २ छक्कासहित सर्वाधिक ४७ रनमा र गायकवाड १६ बलमा ३ चौका र १ छक्कासहित २६ रनमा आउट भएका थिए । यस्तै, अजिंक्य रहाणे १३ बलमा २ चौका र २ छक्कासहित २७ रन र अम्बाती रायडू ८ बलमा १ चौका र २ छक्कासहित १९ रनमा आउट भएका थिए ।
टोलीलाई जितको लागि १४ बलमा २२ रन चाहिँएको अवस्थामा क्रिजमा आएका कप्तान महेन्द्र सिंह धोनी पहिलो बलमै क्याच आउट भएका थिए । गुजरातका लागि मोहित शर्माले सर्वाधिक ३ विकेट तथा नूर अहमदले २ विकेट लिएका थिए ।
.jpg)
त्यसअघि, घरेलु मैदानमा टस हारेर पहिला ब्याटिङको निम्तो पाएको गुजरातले निर्धारित २० ओभरमा ४ विकेट गुमाउँदै २ सय १४ रन बनाएको थियो । घरेलु टोली गुजरातलाई विशाल योगफलमा पुर्याउन युवा ब्याटर साई सुदर्शनले ४७ बलमा ८ चौका र ६ छक्कासहित सर्वाधिक ९६ रनको सानदार इनिङ खेलेका थिए ।
यस्तै, ऋद्धिमान साहले ३९ बलमा ५ चौका र १ छक्काको सहयोगमा ५४ रनको अर्धशतकीय इनिङ खेलेका थिए । शुभमन गिलले २० बलमा ७ चौकासहित ३९ रन तथा कप्तान हार्दिक पाण्ड्याले १२ बलमा २ छक्कासहित अविजित २१ रन जोडेका थिए । चेन्नईका लागि मथीशा पाथिरानाले २ विकेट, रवीन्द्र जडेजा र दीपक चाहरले समान १/१ विकेट लिएका थिए ।
.jpg)
चेन्नईले पहिलो क्वालिफायरमा गुजरातलाई १५ रनले हराउँदै फाइनलमा स्थान बनाएको थियो । गुजरातले दोस्रो क्वालिफायरमा मुम्बईलाई ६२ रनले हराउँदै फाइनलमा स्थान बनाएको थियो । उपाधिसँगै चेन्नईले २० करोड भारु पुरस्कार जितेको छ । यस्तै, उपविजेता गुजरातले १३ करोड भारुमा चित्त बुझाएको छ ।
-1753500480.jpg)
