काठमाडौं । आइसिसी एकदिवसीय विश्वकप छनोटको अन्तिम खेलमा नेदरल्यान्ड्सँग पराजय ब्यहोरेसँगै नेपालको विश्वकप खेल्ने सपना अधुरै बनेको छ । जिम्बावेको टाकासिंगा स्पोर्टस् क्लब क्रिकेट मैदानमा शनिबार नेदरल्यान्ड्ससँग जित्नै पर्ने खेलमा नेपाल ७ विकेटले पराजित भएको हो ।
नेपाल चार मध्य तीन खेलमा हार एकमा जितका साथ समूह चरणबाटै बाहिरिएको हो । विश्वकप छनोट प्रतियोगिताको समूह चरणबाट बाहिरिने नेपाल तेस्रो राष्ट्र बनेको छ । यस अघि नेपालसँगै समूह ‘ए’ मा रहेको अमेरिका तथा समूह ‘बी’ मा रहेको युएई प्रतियोगिताबाट बाहिरीसकेका छन् ।
नेपालले जितको लागि दिएको १ सय ६८ रनको मध्यम लक्ष्य नेदरल्यान्ड्सले २७ दशमलब १ ओभरमा ३ विकेट गुमाएर पूरा गर्यो । नेदरल्यान्ड्सको जितमा ओपनर म्याक्स ओडाउडले ७५ बलमा ८ चौका र ४ छक्कासहित सर्वाधिक ९० रनको शानदार अर्धशतकीय ईनिङ खेलेका थिए ।
नेदरल्यान्ड्सँलाई जितको लागि १० रन चाहिँदा गुलशन झाले २७ औं ओभरको पहिलो बलमा म्याक्स ओडाउडलाई बोल्ड आउट गरेपछि ओडिआई करिअरको पहिलो शतक बनाउने अवसर गुमाएका थिए । बास डि लिडे ३९ बलमा ६ चौकासहित ४१ रनमा नट आउट रहेका थिए ।
म्याक्स ओडाउडले अर्का ओपनर विक्रमजित सिंहसँग मिलेर पहिलो विकेटका लागि ८६ रनको शानदार साझेदारी गरेका थिए । भारतीय मुलका विक्रमजित सिंह ४३ बलमा ३ चौका र १ छक्कासहित ३० रनमा सन्दीप लामिछानेको बलमा आउट भएका थिए ।
सन्दीप लामिछानेको बलमा वेस्ली ब्यारी ३ रनमा दीपेन्द्रसिंह ऐरीबाट आउट भए । नेपालका लागि लेग स्पिनर सन्दीप लामिछानेले १० ओभरमा ६० रन खर्चेर २ विकेट लिएका थिए । गुलशन झाले ६ ओभरमा २७ रन खर्चेर १ विकेट लिएका थिए ।
त्यसअघि, टस हारेर पहिला ब्याटिङको निम्तो पाएको नेपाल ४४ दशमलब ३ ओभरमा १ सय ६७ रनमा अल आउट भएको थियो । नेपालका लागि कप्तान रोहितकुमार पौडेलले ५५ बलमा ३ चौका र १ छक्कासहित सर्वाधिक ३३ रन बनाए । नेपालका ओपनर आसिफ शेख तेस्रो ओभरको दोस्रो बलमा शुन्य रनमा आउट भएका थिए ।
सुपर सिक्स पुग्न जित्नैपर्ने समूह चरणको अन्तिम खेलमा नेपालले उत्कृष्ट प्रदर्शन गर्न सकेन । नेपालका कुनै ब्याटरका बीचमा पनि सम्झनलायक साझेदारी हुन सकेन । सन्दीप लामिछानेले ३३ बलमा ४ चौकाको सहयोगमा २७ रन बनाए । ओपनर कुशल भुर्तेलले ४२ बलमा २ चौकाको सहयोगमा २७ रन बनाए ।
भीम सार्कीले ५६ बलमा १ चौकाको सहयोगमा २२ रन तथा गुलशन झाले ३१ बलमा १५ रन बनाएका थिए । दीपेन्द्रसिंह ऐरीले १४ रन तथा कुशल मल्लले १२ रन बनाएका थिए । नेदरल्यान्ड्सका तीव्र गतिका बलरको शर्ट र बाउन्सर बलको सामना गर्न नसक्दा नेपाल सस्तैमा अल आउट भएको थियो ।
नेदरल्यान्ड्सका लागि तीव्र गतिका बलर लोगन भान बीकले ९.३ ओभरमा १ मेडनसहित २४ रन खर्चेर सर्वाधिक ४ विकेट लिएका थिए । बास डि लिड र विक्रमजित सिंहले समान २/२ विकेट लिएका थिए । क्लेटन प्लोयट र आर्यान दत्तले समान १/१ विकेट लिएका थिए ।
नेपाल समूह ‘ए’ बाट ४ खेलमा तीन खेलमा हार एकमा जितसहित चौथो स्थानमा रहेर बाहिरियो । समूह ‘ए’ बाट वेस्टइन्डिज, जिम्बावे र नेदरल्यान्ड्स सुपर सिक्समा पुगेका छन् । नेपालले अव ७ औं देखी १० औं स्थान सम्मको लागि प्लेअफ खेल्नेछ । नेपालले प्लेअफमा समूह ‘बी’ को पुछारको टोलीसँग खेल्नेछ ।
नेपाल यसअघि आइतबार भएको पहिलो खेलमा घरेलु टोली जिम्बावेसँग ८ विकेटले पराजित भएको थियो । नेपालले मंगलबार भएको दोस्रो खेलमा अमेरिकामाथि ६ विकेटको जित निकालेको थियो भने बिहीबार भएको तेस्रो खेलमा वेस्ट इन्डिजसँग १ सय १ रनले पराजित भएको थियो ।
समूह ‘ए’ बाट नेपाल र अमेरिका तीन हारको साथ बाहिरिएको छ । विश्वकप छनोटको समुह ‘ए’ मा नेपाल, आयोजक जिम्बावे, वेस्टइन्डिज, अमेरिका र नेदरल्यान्ड्स रहेका छन् । समूह ‘बी’ मा आयरल्यान्ड, श्रीलंका, युएई, स्कटल्यान्ड र ओमान रहेका छन् ।
दश टोली सहभागी यस प्रतियोगिताको शीर्ष दुई टोलीले आइसीसी विश्वकपमा स्थान बनाउने छन् । दश राष्ट्र सहभागी विश्वकप सुपर लिगका शीर्ष आठ टोली आयोजक भारत, पाकिस्तान, अस्ट्रेलिया, न्युजिल्यान्ड, बंगलादेश, इङ्ल्यान्ड, दक्षिण अफ्रिका र अफगानिस्तानले सिधै विश्वकपमा स्थान बनाइसकेका छन् ।
