काठमाडौं । नेपाल टेस्ट टोली आयरल्यान्डसँग आईसीसी विश्वकप छनोटको सातौँ स्थानको खेलमा अन्तिम ओभरमा पराजित भएको छ । जिम्बाब्वेको राजधानी हरारेस्थित ताकासिंगा स्पोर्ट्स क्लबमा मंगलबार भएको खेलमा आयरल्यान्डले नेपाललाई दुई विकेटले हराएको हो ।
हरासँगै नेपालले १० टोली सहभागी प्रतियोगितामा आठौं हुँदै विश्वकप छनोटको यात्रा समाप्त गरेको छ । नेपालले जितको लागि दिएको २ सय ६९ रनको विजयी लक्ष्य आयरल्यान्डले निर्धारित ओभर सकिनुभन्दा ४ बल अगाडि पूरा गरेको थियो ।
टेष्ट राष्ट्र आयरल्यान्डलाई जितको लागि अन्तिम ६ बलमा ५ रन चाहिँएको थियो । ग्यारेथी डेलानीले पहिलो बलमा एक रन लिए । ब्यारी म्याकार्थीले आफूले सामना गरेको दोस्रो बलमै थर्डमा विजयी चौका प्रहार गरेका थिए । डेलानी १६ रनमा र म्याकार्थी ४ रनमा अविजित रहे ।
आयरल्यान्डको जितमा कुर्टिस क्यामफेर र ह्यारी टेक्टरले अर्धशतकीय ईनिङ खेलेका थिए । ह्यारी टेक्टरले ७६ बलमा ४ चौका र २ छक्कासहित ६० रनको योगदान दिए । त्यस्तै कुर्टिस म्याम्फर ५९ बलमा ८ चौका र १ छक्कासहित ६२ रनमा आउट भएका थिए ।
स्पिनर सन्दीप लामिछानेको १५ औं ओभरको तेस्रो बलमा ह्यारी टेक्टरको क्याच किशोर महतोले लङअनमा ब्यक्तिगत २१ रनमा छाड्न पुगेका थिए । त्यो छाड्न पुगेको क्याच नेपाललाई भारी पर्यो । जर्ज डकरेलले ४७ बलमा २ चौका र १ छक्कासहित ३३ रनमा आउट भएका थिए ।
तीव्र गतिका बलर करण केसीले पाँचौं ओभरको पाँचौं बलमा ओपनर एन्डी म्याकब्रिनलाई १७ रनमै प्वाइन्टमा कुशल भुर्तेलबाट क्याच आउट गराएका थिए । अर्को ओभरमा किशोर महतोले कप्तान एन्डी बालबर्नीलाई प्वाइन्टमै एक रनमा दीपेन्द्रबाट क्याच गराएपछि नेपालले राम्रो सुरुवात गरेको थियो ।
ओपनर पल स्टरलिङलाई गुलशन झाले १२ औं ओभरको अन्तिम बलमा १५ रनमै बोल्ड आउट गरे । स्टरलिङले २४ बलमा २ चौका प्रहार गरेका थिए । लुर्केन टुकेरले २२ बलमा २ चौका र १ छक्कासहित २४ रनमा आउट भएका थिए ।
नेपालका लागि तीव्र गतिका बलर करण केसीले १० ओभरमा १ मेडनसहित ५८ रन खर्चेर सर्वाधिक ४ विकेट लिए । किशोर महतोले १० ओभरमा ५५ रन खर्चेर २ विकेट लिएका थिए । स्पिनर सन्दीप लामिछानेले १० ओभरमा ४२ रन खर्चेर १ विकेट लिए । गुलशन झाले १ विकेट लिएका थिए ।
त्यसअघि, टस हारेर पहिला ब्याटिङको निम्तो पाएको नेपालले निर्धारित ५० ओभरमा ९ विकेट गुमाएर २ सय ६८ रन बनाएको थियो । नेपालका लागि युवा अलराउन्डर गुलसन झाले ४२ बलमा ४ चौका र ३ छक्कासहित अविजित ५७ रनको अर्धशतकीय ईनिङ खेलेका थिए ।
स्पिनर सन्दीप लामिछाने ३० बलमा ३ चौका र १ छक्कासहित ३२ रनमा क्याच आउट भएका थिए । आठौं विकेटका सन्दीप र गुलशनले ८० रनको साझेदारी गर्दै प्रतिस्पर्धात्मक योगफल तयार पारेका थिए । नेपालबाट ओडिआईमा आठौं विकेटका लागि भएको यो सबैभन्दा उच्च साझेदारी हो ।
ओपनर अर्जुन साउदले ८४ बलमा ३ चौका र २ छक्कासहित ४८ रन बनाएका थिए । कप्तान रोहित पौडेल ३५ बलमा २ चौका र १ छक्कासहित २९ रनमा कर्टिस क्याम्फरको बलमा एज लागेर विकेटकिपर लोर्कान टकरबाट सहज क्याच आउट भएका थिए ।
बायाँ हाते विष्फोटक ब्याटर कुशल मल्लले ३८ बलमा ५ चौका र २ छक्कासहित ४४ रन बनाए । क्रेग योंगको बलमा ओपनर कुशल भुर्तेल ८ रनमै समातिन पुगेका थिए । ज्ञानेन्द्र मल्ल १३ बलमा १ चौकासहित ७ रनमै आउट भएका थिए । भीम सार्की २० रनमा, करण केसी ४ रनमा र दीपेन्द्रसिंह ऐरी डक आउट भएका थिए ।
आयरल्यान्डका लागि तीव्र गतिका बलर क्रेग योंगले ७ ओभरमा ३६ रन खर्चेर २ विकेट लिए । मार्क आदिरले ९ ओभरमा १ मेडनसहित ४७ रन खर्चेर २ विकेट लिए । ब्यारी म्याकार्थीले १० ओभरमा १ मेडनसहित ६३ रन खर्चेर २ विकेट लिए । कर्टिस क्याम्फर, ग्यारेथ डेलानी र एन्डी म्याकबर्नीले समान १/१ विकेट लिएका थिए ।
नेपाल विश्वकप छनोटको समूह ‘ए’ बाट ४ खेलमा ३ मा हार र १ मा जित सहित चौथो स्थानमा रहेर बाहिरिएको थियो । नेपालले अमेरिकालाई ६ विकेटले हराएको थियो । नेपाल जिम्बावेसँग ८ विकेटले, वेस्ट इन्डिजसँग १ सय १ रनले र नेदरल्यान्ड्ससँग ७ विकेटले पराजित भएको थियो ।
-1771081584.JPG)
-1769518498.jpg)
-1770731452.JPG)
-1769858079.jpg)
-1770898199.JPG)
-1769263138.jpg)