सेभेन ए साइड फुटबलको उपाधि बुद्ध माविलाई

फुटबल

Home
फुटबल
सेभेन ए साइड फुटबलको उपाधि बुद्ध माविलाई

सेभेन ए साइड फुटबलको उपाधि बुद्ध माविलाई

खेलकुद मञ्‍च मंगलबार, माघ २९, २०८१

ललितपुर । दोस्रो संस्करणको गोदावरी नगरपालिकास्तरीय अन्तरविद्यालय सेभेन ए साइड फुटबल प्रतियोगिताको उपाधि बाँडेगाउँको बुद्ध माविले जितेको छ । ढोलाहिटीस्थित विनायक स्पोर्ट्स कम्प्लेक्समा बिहीबार सम्पन्न भएको फाइनल खेलमा लेलेको अमरकान्ति माध्यमिक विद्यालयलाई ४–२ गोल अन्तरले हराउँदै बुद्ध माविले दोस्रो पटक गोदावरी नगर विद्यालयस्तरीय प्रतियोगिता जितेको हो ।

बुद्धको जितमा सचिन तामाङले २ तथा राज घिमीरे र प्रमेश थिङले १–१ गोल गरे । पराजित अमरकान्तिका लागि जिगरजंग सिलवालले दुबै गोल गरे । विजेता भएसँगै बुद्ध माविले ५० हजार नगदसहित ट्रफी, मेडल र प्रमाणपत्र प्राप्त गरेको छ । यस्तै उप विजेता अमरकान्तिले २५ हजारसहित ट्रफी, मेडल र प्रमाणपत्र पाएको छ । श्री ज्ञानकुण्ड यूवा क्लबको आयोजनामा भएको प्रतियोगितामा सर्वोत्कृष्ट खेलाडी गंगा जमुना स्कूलका विपिन मर्हजन भए । यस्तै उत्कृष्ट गोलकिपर बुद्ध माविका सुमन तिरुवा भए भने उदयमान खेलाडीको पुरस्कार सरस्वती मावि लेलेका कर्मा तामाङले पाए ।

सरस्वती माविकै उत्सब नगरकोटी सर्बाधिक गोलकर्ता भए । विधागततर्फ उत्कृष्ट खेलाडी, गोलरक्षक, गोलकर्ता र उदयीमान खेलाडीले जनही ५ हजार पाएका छन् । विजेता तथा उपविजेता खेलाडीलाई गोदावरी नगरपालिकाका मेयर गजेन्द्र मर्हजनले पुरस्कार प्रदान गरे । सेमिफाइनलमा बुद्ध माविले लेलेको गंगा जमुना माविलाई तथा लेलेको अमरकान्तिले रिदभान एकेडेमीलाई हराएर फाइनलमा पुगेका थिए । प्रतियोगितामा नगरपालिकाभित्रका १७ वटा विद्यालयको सहभागिता रहेको थियो ।

गोदावरी नगरपालिकाका मेयर मर्हजनले नगरभित्र फुटबलको दिगो विकासका लागि विद्यालयस्तरीय फुटबल कोशेढुङ्गा हुने बताए । मेयरकप फुटबलको तयारीमा नगरपालिका रहेको बताउँदै उनले प्रतियोगिता सँगसँगै पूर्वाधार निर्माणको काममा पनि नगरपालिका जुटिरहेको बताए । नगरपालिकाका प्रवक्ता एवं वडा नम्बर ५ का वडा अध्यक्ष मिलन सिलवालले विद्यालयस्तरको फुटबलले नगरको फुटबललाई ग्रासरुटमै बलियो बनाउने प्रयास गरेको बताए । क्लबका कार्यवाहक अध्यक्ष एवं प्रतियोगिता संयोजक निकेश श्रेष्ठले नगरले आर्थिक सहयोग गरेको खण्डमा हरेक वर्ष यस्तै प्रतियोगिता आयोजना गरिरहने बताए ।

प्रकाशित मिति: मंगलबार, माघ २९, २०८१ २२:०४